“Saat Meydanı” turistik istirahət mərkəzində Naxçıvan Muxtar Respublikası Fövqəladə Hallar Nazirliyinin və Naxçıvan Muxtar Respublikası Turizm Departamentinin birgə təşkilatçılığı ilə “Mehmanxana və mehmanxana tipli yerləşmə vasitələrində ehtimal olunan fövqəladə hallar və fövqəladə hallara qarşı görüləcək tədbirlər” mövzusunda seminar-müşavirə keçirilib.

Muxtar respublika ərazisində fəaliyyət göstərən mehmanxana və mehmanxana tipli yerləşmə vasitələrinin rəhbərləri və cavabdeh vəzifəli şəxslərin, turoperatorların iştirakı ilə keçirilən tədbirin məqsədi bu kimi obyektlərdə insanların həyatı və sağlamlığı üçün ehtimal olunan fövqəladə hadisələrə qarşı tədbirlərin görülməsindən ibarət olub.

Tədbirdə çıxış edənlər muxtar respublika ərazisində fəaliyyət göstərən mehmanxana və mehmanxana tipli yerləşmə vasitələrində ehtimal olunan fövqəladə hallar, onların qarşısının alınması məqsədilə görüləcək tədbirlər haqqında məlumat veriblər. 

Çıxışlarda mehmanxanalarda yanğın təhlükəsizliyinin mövcud vəziyyəti təhlil olunub, yanğın hadisələrinin baş vermə səbəbləri izah olunub. Yanğın təhlükəsizliyinin təmin olunmasında müəssisələrin hüquq və vəzifələri  diqqətə çatdırılıb. 

Bildirilib ki, yanğın təhlükəsizliyi qaydaları ilə müəyyən olunan tələblərə hər bir cavabdeh şəxs  ciddi əməl etməlidir. 

Tədbirdə həmçinin turistlərin, qonaqların təhlükəsizliyinin təmin edilməsində  turoperatorların üzərlərinə düşən vəzifələrdən də ətraflı bəhs olunub. Qeyd olunub ki, turizm zərfini formalaşdırarkən turistlərin təhlükəsizliyinin təmin edilməsi üçün zəruri tədbirlər görmək və mümkün olan təhlükələr barədə onları məlumatlandırmaq diqqətdə saxlanılmalı, həmçinin  turistlərə təxirəsalınmaz təcili yardım göstərilməsi  də təşkil edilməlidir.

İnteraktiv formada keçirilən tədbir zamanı suallar ətraflı cavablandırılıb, mövzu ilə bağlı videoçarx nümayiş olunub.