24 oktyabr 2024-cü il tarixdə Ordubad rayonunun Anaqut kəndində kənd turizminin inkişafı məqsədilə kənd sakinləri ilə görüş keçirilmişdir. Tədbirdə çıxış edən Ordubad rayon İcra Hakimiyyəti başçısının Dırnıs kənd inzibati ərazi dairəsi üzrə nümayəndəsi Asəf Abdullayev bildirmişdir ki, geniş yayılmış kənd turizminin inkişafı üçün muxtar respublikanın ucqar dağ kəndlərində müasir tələblərə cavab verən şərait vardır. Tarixinin qədimliyi, təbiətinin rəngarəngliyi, mətbəxinin zənginliyi və insanlarının qonaqpərvərliyi kimi müsbət keyfiyyətləri bu kəndlərdə kənd turizminin geniş inkişaf imkanlarından xəbər verir. Əhalinin həyat səviyyəsinin və məşğulluğunun yüksəldilməsi nəticəsində komfortlu həyat tərzinə keçid də sürətlənir ki, bu da öz tətilini səfalı dağ kəndlərində keçirmək istəyənlərin sayını artırır. Vurğulanmışdır ki, kənd turizminin kəndin sosial-iqtisadi problemlərinin həllinə müsbət təsiri kompleks və sistemli xarakter daşıyır, çünki kənd əhalisinin məşğulluğunun genişləndirilməsinə kömək edir və kənd yaşayış məntəqələrinin abadlaşdırılmasını stimullaşdırır. Beləliklə, kənd turizmi ilə məşğul olmaqla hər bir kənd sakini əlavə gəlir mənbəyinə malik olur.

Daha sonra Naxçıvan Muxtar Respublikası Turizm Departamentinin Statistika və sertifikatlaşdırma sektorunun müdiri Süleyman Rüstəmov çıxış edərək bildirmişdir ki, Azərbaycan Respublikasının Prezidenti cənab İlham Əliyevin 2023-cü il 5 iyun tarixli Sərəncamı ilə təsdiq olunmuş “Naxçıvan Muxtar Respublikasının sosial-iqtisadi inkişafına dair 2023-2027-ci illər üçün Dövlət Proqramı”nda bütün sahələrin inkişafı ilə yanaşı, turizmin inkişafı da prioritet sahələrdən biri kimi qeyd olunmuşdur. Məruzəçi tədbir iştirakçılarına Dövlət Proqramının əhəmiyyətini vurğulamış, muxtar respublikanın turizm potensialı haqqında geniş məlumat vermişdir. Bildirmişdir ki, turizm iqtisadiyyatın ən dinamik inkişaf edən sahələrindən biri sayılır. Azərbaycanda da bu sahənin inkişafına ciddi diqqət göstərilməkdədir. Azərbaycanın, o cümlədən dünyanın ən qədim yaşayış və mədəniyyət mərkəzlərindən biri olan Naxçıvanda turizmin inkişafı muxtar respublika iqtisadiyyatının prioritet sahələrindən biri hesab edilir. Naxçıvan Muxtar Respublikasının coğrafi mövqeyi, özünəməxsus iqlimi, fauna və florası, təbii bulaqları, mineral və müalicəvi suları, qədim tarixə malik tarix-memarlıq və mədəniyyət abidələri turizmin inkişafı üçün əlverişli şərait yaradır. 

          Məruzəçi qeyd etmişdir ki, bərəkətli torpaq, saf su, təmiz hava, zəngin dərman bitkiləri, bol günəş – bütün bunlar Naxçıvanda ekoloji turizmin inkişafı üçün geniş imkanlar açır. Qədim diyarın kənd turizm potensiallı yaşayış məntəqələri kənd turizminin inkişafı üçün səciyyəvi xüsusiyyətlərə malikdirlər. Şəhərin səs-küyündən uzaq, fərqli mühitdə dincəlmək istəyənlər adətən kənd turizminə üstünlük verirlər. Turizmin bu növü getdikcə populyarlığını artırmaqdadır. Dağların qoynunda, füsunkar təbiət mənzərələri ilə zəngin, sadə, kiçik bir kənd evində yaşamaq 5 ulduzlu hotellərdə qalmaq arzusunu bəzən üstələyir. 

          Məruzəçi   kənd evi, kənd evində qonaqlama xidmətinin təşkili, kənd evində qonaqlama xidməti üçün tələblər, qonaqların qarşılanması və yola salınması, qonaqların məmnunluğunun təmin edilməsi, qidalanmanın təşkili, ev sahibləri tərəfindən turistlərə göstərilən əlavə xidmətlər və digər mövzular haqqında tədbir iştirakçılarını məlumatlandırmışdır. 

             Tədbirin sonunda kənd sakinlərini maraqlandıran suallar cavablandırılmışdır.